Pêwîste Ocalan azad bibe

0
9

Alîkarê Serokê Desteya Şêwirmendiya Mafên Mirovan a NY û Raportorê Taybet ê Mafê Xwarinê yê NY Jean Zîegler, ku hevalekî nêz ê lîderê şoreşgerî Ernesto Che Gûevera bû diyar kir ku PKK, tevgereke azadiyê ye û li dijî terora DAIŞ’ê şer dike, divê her kes piştgiriya PKK’ê bike. Ziegler got, “pêwîste Ocalan azad bibe û PKK ji lîsteya terorê were derxistin.”

Alîkarê Serokê Desteya Şêwirmendiya Mafên Mirovan a Neteweyên Yekbûyî û Raportorê Taybet ê Mafê Xwarinê yê Neteweyên Yekbûyî Civaknas-Nivîskar Jean Zîegler, ku hevalekî nêz ê lîderê şoreşgerî yê Latîn Amerîka Ernesto Che Gûevera bû got; “PKK tevgereke berxwedanê ya rewa ye û got, “Eger Che îro bijiya, wê bi PKK’ê re şer bikira.”
Zîegler rapora meha Adarê ya Neteweyên Yekbûyî (NY) a li ser bajarên Bakurê Kurdistanê bi bîr xist û got, “Dewleta Tirk li bajarên Bakurê Kurdistanê bi rengekî tirsnak sûcê li dijî mirovahiyê kir. Ev sûc di wê astê de ye ku wê Tirkiyê li Dadgeha Ceza ya Navneteweyî mehkeme bike.”
Jean Zîegler got, “Divê Konseya Ewlekariyê ya NY dosyaya li ser bûyerên li bajarên Bakurê Kurdistanê qewimîn binirxîne û ji bo bişîne ber destê Dadgeha Ceza ya Navneteweyî erê bike.”
DIVÊ OCALAN
AZAD BIBE
Jean Zîegler bal kişand ser pêkanînên dewleta Tirk ên li dijî Rêberê Gelê Kurd Abdullah Ocalan û destnîşan kir, ku divê teqez Ocalan azad bibe. Zîegler destnîşan kir ku girtina Ocalan li girtîgehê û pêkanînên li dijî wê bi ti awayî mafdar nînin û got, “Girîng e Koma Xebatê ya Girtina Kêfî ya Mafên Mirovan a NY bixwaze ku li ser rewşa Ocalan lêpirsînek were vekirin. Û ji bo azadiya Ocalan bi rola xwe rabe.”
REJÎMA ERDOGAN REJÎMEKE FAŞÎST E
Zîegler rejîma Erdogan weke rejîmeke faşîst û totalîter bi nav kir û wiha dewam kir: “Pêwîste mafên Kurdan ên nasname û xweser bên qebûlkirin. Divê tavilê bi PKK’ê re muzakere bê destpêkirin. Ocalan bê azadkirin. Kesên ku li Kurdistanê sûc li dijî mirovahiyê kirine bên eşkerekirin û darizandin.”
HELWESTA ELMANYAYÊ TEWŞ E
Jean Zîegler rexne kir ku PKK di ‘lîsteya rêxistinên terorê’ ya Ewropayê de tê hiştin û got, ne ya qebûlkirinê ye ku hêzeke girîng a li dijî DAIŞ’ê şer dike di vê lîsteyê de were hiştin. Zîegler helwesta Elmanyayê ya li dijî PKK’ê jî weke helwesteke tewş bi nav kir.
PKK TEVGEREKE BERXWEDANÊ
YA REWA YE
Zîegler destnîşan kir ku PKK mîna Kongreya Neteweyî ya Afrîkayê (ANC) a Nelson Mandela tevgereke azadî û rewa ye û wiha dewam kir: “PKK tevgereke rizgariya neteweyî û azadiyê ye. PKK tevgereke berxwedanê ya rewa ye ku li dijî faşîzm û tîraniyê şer dike. Mîna berxwedana Fransiyan a li dijî Naziyan. Bi awayekî vekirî dibêjim; PKK tevgereke rizgarî û azadiyê ye ku cihê şanazî û pesindayinê ye. Heqê wê ye ku her kes piştgiriyê bide wê.”
CHE BIJIYA WÊ LI NAVA REFÊN PKK’Ê BÛYA
Jean Zîegler ku hevalekî nêz ê şoreşgerê enternasyonalîst Che Gûevara ye got, “Eger Che îro bijiya wê li nava refên PKK’ê şer bikira. Bêguman Che mînaka herî bedew a tevgerên azadî û rizgariya neteweyî ye. Careke din dibêjim; eger bijiya wê yekser cihê xwe di nava PKK’ê de bigirta û li dijî rejîmên faşîst, otokratîk û terorîst şer bikira.”

NO COMMENTS

LEAVE A REPLY

*